Rydyn ni wrth ein bodd bod Mandy wedi cael ei chyhoeddi'n un o'r rhai sydd wedi cyrraedd y rownd derfynol yng nghategori 'Outstanding Individuals' Gwobrau'r Loteri Genedlaethol 2023.
Mae mam o Sir y Fflint sydd wedi colli ei mab, ac sy'n gweithio'n ddiflino i wella bywydau cleifion canser ifanc er cof am ei mab yn ei arddegau, yn gobeithio cael cydnabyddiaeth arbennig ar ôl cael ei henwebu yn adran 'outstanding individuals' Gwobrau'r Loteri Genedlaethol 2023.
Gwobrau'r Loteri Genedlaethol yw'r dathliad blynyddol o'r unigolion a'r sefydliadau cyffredin sy'n gwneud pethau rhyfeddol gyda chymorth cyllid y Loteri Genedlaethol.
Mae Mandy Giddins o'r Fflint, a gollodd ei mab 18 oed, Jordan, i glefyd prin yn y gwaed ac i ganser yn 2017, wedi cael ei rhestru ar gyfer Gwobr Cyflawniad Arbennig yn adran yr unigolion rhagorol yng Ngwobrau eleni. Mae hyn i gydnabod ei hymdrechion diwyro i wella bywydau cleifion canser ifanc drwy gymorth ymarferol ac anrhegion arbennig.
Eleni, cafodd 3,780 o bobl a phrosiectau ledled y DU eu henwebu ar gyfer Gwobrau'r Loteri Genedlaethol i gydnabod eu hymdrechion diwyro i wella eu cymuned. Ar ôl i banel fynd drwy filoedd o enwebiadau, mae Mandy bellach yn un o ddim ond pump unigolyn ledled y DU sydd ar y rhestr fer yn y categori Cyflawniad Arbennig, ac mae'n aros i weld a fydd yn cael ei choroni'n unigolyn rhagorol y DU yn ei grŵp.
Cafodd Mandy, sy'n Ymarferydd Nyrsio, ei hysbrydoli gan agwedd gadarnhaol a hiwmor da Jordan yn wyneb adfyd i wneud rhywbeth gwerth chweil i gadw ei etifeddiaeth yn fyw, ac felly y ganwyd Giddo's Gift.
Gyda chymorth The National Lottery Community Fund, mae Mandy, drwy Giddo's Gift, wedi codi mwy na £350,000 i wella bywydau pobl 13 i 24 oed sydd â chanser ledled Gogledd Cymru a Gogledd Orllewin Lloegr, ar ôl gweld effaith y salwch ar Jordan a'i gyfoedion. Hyd yma, mae Giddo's Gift wedi gweithio gyda channoedd o deuluoedd, gan wireddu dymuniadau o leiaf 50 o blant bob blwyddyn, yn ogystal â gwasanaethau cymorth eraill.
Mae'r cymorth yn amrywio o anrhegion fel gliniaduron, ffonau a chonsolau ar gyfer arosiadau hir yn yr ysbyty, i offer ymarferol fel blychau osgiliadol fel y gallant gael trallwysiadau gartref. Mae'r elusen hefyd yn cynnig grantiau profedigaeth a blychau cofio i deuluoedd sy'n colli person ifanc, yn ogystal â hybu ymwybyddiaeth o ganserau plentyndod.
Llynedd, daeth yr elusen yn berchen ar Giddo's Gaff, carafán sefydlog ym Mhorthmadog, Gogledd Cymru, lle gall teuluoedd sydd â phlentyn â chanser, neu sydd wedi colli rhywun annwyl, gael seibiant am ddim. Cymerodd bum mlynedd i godi arian ar gyfer y cyfleuster, gyda chyllid y Loteri Genedlaethol yn talu ffioedd y safle a'r cyfleustodau am y flwyddyn gyntaf. Hyd yma, mae mwy na 60 o deuluoedd wedi defnyddio'r garafán.
Dywedodd Mandy: “Rwy'n teimlo'n freintiedig ac wedi fy llethu o gael fy enwebu, gan fod popeth rwy'n ei wneud yn deillio o'r cariad sydd gen i at fy mab. Byddai unrhyw wobr ar ran pawb sy'n brwydro yn erbyn canser a'r bywydau a gollwyd. Mae'r driniaeth yn greulon. Rwy'n falch iawn o'r ffordd yr ymdriniodd Jordan â phopeth, gyda gwên ar ei wyneb. Mae'r elusen wedi dod mor bell o ganlyniad i'w bersonoliaeth garedig a gofalgar, a'i benderfyniad i gael canlyniadau gwell i'r rhai sy'n brwydro yn erbyn canser plentyndod.”
Yn ystod yr haf, bydd panel sy'n cynnwys cynrychiolwyr The National Lottery a phartneriaid o bob rhan o'r DU yn penderfynu ar yr enillwyr ym mhob un o'r categorïau unigol. Cyhoeddir yr enillwyr yn yr Hydref, a byddant yn derbyn gwobr ariannol o £5,000 i'w sefydliad a thlws dymunol Gwobrau'r Loteri Genedlaethol.