Yn gynharach y mis hwn, cafodd Mandy Giddins, sylfaenydd Giddo’s Gift a mam Jordan (Giddo), yr anrhydedd arbennig o fynychu parti gardd mawreddog ym Mhalas Buckingham. Teithiodd Mandy a’i gŵr, Paul, tad Jordan, o dref fach y Fflint yng Ngogledd Cymru i ganol Llundain i gael cinio gydag aelodau blaenllaw o’r frenhiniaeth Brydeinig.
Cafodd Mandy wahoddiad gan y teulu brenhinol, a bu’n ymuno â gwesteion eraill yng ngerddi’r palas i ddathlu ei hanrhydedd diweddar: y cyhoeddiad yn gynharach eleni y byddai’n derbyn Medal yr Ymerodraeth Brydeinig (B.E.M.) am ei “gwasanaethau gwirfoddol ac elusennol i Bobl Ifanc â Chanser.”
Er gwaethaf y glaw mân Prydeinig arferol, mwynhaodd Mandy a Paul y digwyddiad yn fawr, yn enwedig y band pres bywiog ar y lawnt. Ymhlith y gwesteion (a’r ymbarelau), cafodd Mandy y profiad cofiadwy o weld y Tywysog William, a ychwanegodd gyffyrddiad brenhinol at y diwrnod glawog.
Wrth fyfyrio ar yr achlysur, dywedodd Mandy: “Roedd yn fraint anhygoel ac yn teimlo’n swreal bod yno. Roedd hefyd yn chwerwfelys, gan fod ein holl ymdrechion gyda Giddo’s Gift er cof am ein hannwyl Jord, fyddai wedi bod wrth ei fodd â’n taith i’r ddinas fawr – gwnaethon ni hyd yn oed yn siŵr ein bod ni’n cael pryd yn Nando’s gan ei fod yn dwlu bwyta yno.
“Mae’r anrhydedd hon i Jord ac i’r holl bobl ifanc rydyn ni’n anelu at eu cefnogi.”
Mae Giddo’s Gift, a sefydlwyd er cof am fab Mandy a gafodd ei adenydd angel yn 2017, wedi bod yn allweddol wrth ddarparu cymorth a gofal i gleifion ifanc â chanser, gan gael effaith ddofn ar fywydau di-rif. Mae’r gydnabyddiaeth hon gan Fedal yr Ymerodraeth Brydeinig nid yn unig yn amlygu ymroddiad Mandy ond hefyd yn codi mwy o ymwybyddiaeth o’r achos y mae hi’n ei hyrwyddo mor angerddol.
Bydd Mandy yn derbyn ei B.E.M. yn swyddogol mewn seremoni leol yn ddiweddarach eleni, lle bydd yn cael ei hanrhydeddu ochr yn ochr â derbynwyr lleol eraill y wobr fawreddog hon. Bydd y digwyddiad hwn nid yn unig yn adeg o falchder i’r teulu Giddins, ond i’r gymuned gyfan, sydd wedi cefnogi’r elusen fach ond nerthol hon yn ddi-ffael ers y diwrnod cyntaf.
Mae cof Jordan yn byw ymlaen wrth i Mandy barhau â’i gwaith gwerthfawr gyda Giddo’s Gift, sy’n cynnwys codi rhagor o arian i’r elusen drwy nifer o ddigwyddiadau diddorol a hwyliog, yn ogystal â chodi ymwybyddiaeth o ganserau plentyndod – a helpu i ddod o hyd i iachâd llai ymosodol ar eu cyfer.
Da iawn ti, Mandy!